ജീവാംശമായ് താനേ നീയെന്നിൽ - തീവണ്ടി

ചിത്രം - തീവണ്ടി ഗാനരചന-ഹരിനാരായണന്‍ സംഗീതം-കൈലാസ് മേനോന്‍ പാടിയത്-ശ്രേയ ഘോഷൽ, ഹരിശങ്കർ പി എസ് ജീവാംശമായ് താനേ നീയെന്നിൽ കാലങ്ങൾ മുന്നേ വന്നൂ ആത്മാവിനുള്ളിൽ ഈറൻ തൂമഞ്ഞായ് തോരാതെ പെയ്തൂ നീയേ പൂവാടി തേടി പറന്നു നടന്ന ശലഭമായ് നിൻ കാല്പാടുതേടി അലഞ്ഞു ഞാൻ ആരാരും കാണാ മനസ്സിൻ ചിറകിലൊളിച്ച മോഹം പൊൻ പീലിയായി വളർന്നിതാ മഴപോലെയെന്നിൽ പൊഴിയുന്നു നേർത്തവെയിലായി വന്നു മിഴിയിൽ തൊടുന്നു പതിവായ് നിന്നനുരാഗം ഒരു കാറ്റുപോലെ പുണരുന്നു നെഞ്ചിൽ നിളപോലെ കൊഞ്ചിയൊഴുകുന്നിതെന്നുമഴക ഈ അനുരാഗം മിന്നും കിനാവിൻ തിരിയായെൻ മിഴിയിൽ ദിനം കാത്തുവെയ്ക്കാം അണയാതെ നിന്നെ ഞാൻ ഇടനെഞ്ചിനുള്ളിലെ ചുടുശ്വാസമായി ഞാൻ ഇഴചേർത്തു വെച്ചിടാം വിലോലമായ് ഓരോ രാവും പകലുകളായിതാ ഓരോ നോവും മധുരിതമായിതാ നിറമേഴിൻ ചിരിയോടെ ഒളി മായാ മഴവില്ലായ് ഇനിയെൻ വാനിൽ തിളങ്ങി നീയേ മഴപോലെയെന്നിൽ പൊഴിയുന്നു നേർത്തവെയിലായി വന്നു മിഴിയിൽ തൊടുന്നു പതിവായ് നിന്നനുരാഗം ഒരു കാറ്റുപോലെ പുണരുന്നു നെഞ്ചിൽ നിളപോലെ കൊഞ്ചിയൊഴുകുന്നിതെന്നുമഴകേ ഈ അനുരാഗം ജീവാംശമായ് താനേ നീയെന്നിൽ കാലങ്ങൾ മുന്നേവന്നൂ ജനൽപ്പടി മേലേ ചുമരുകളാകെ വിരലാൽ നിന്നെ എഴുതി ഇടവഴിയാകെ അലഞ്ഞൊരു കാറ്റിൽ നീയാം ഗന്ധം തേടി ഓരോ വാക്കിൽ ഒരു നദിയായി നീ ഓരോ നോക്കിൽ ഒരു നിലവായി നീ തിര പാടും കടലാകും തളിരോമൽ മിഴിയാഴം തിരയുന്നൂ എൻ മനസ്സു മെല്ലെ ജീവാംശമായ് താനേ നീയെന്നിൽ കാലങ്ങൾ മുന്നേ വന്നൂ ആത്മാവിനുള്ളിൽ ഈറൻ തൂമഞ്ഞായ് തോരാതെ പെയ്തൂ നീയേ പൂവാടി തേടി പറന്നു നടന്നു ശലഭമായ് നിൻ കാല്പാടുതേടി അലഞ്ഞു ഞാൻ ആരാരും കാണാ മനസ്സിൻ ചിറകിലൊളിച്ച മോഹം പൊൻ പീലിയായി വളർന്നിതാ മഴപോലെയെന്നിൽ പൊഴിയുന്നു നേർത്തവെയിലായി വന്നു മിഴിയിൽ തൊടുന്നു പതിവായ് നിന്നനുരാഗം ഒരു കാറ്റുപോലെ പുണരുന്നു നെഞ്ചിൽ നിളപോലെ കൊഞ്ചിയൊഴുകുന്നിതെന്നുമഴകേ ഈ അനുരാഗം

ശ്രീ

കടലറിയില്ല കരയറിയില്ല - കണ്ണൂര്‍

ചിത്രം : കണ്ണൂര്‍
ഗാനരചന : കൈതപ്രം
സംഗീതം : രവീന്ദ്രന്‍
പാടിയത് : യേശുദാസ്, കെ എസ് ചിത്ര









കടലറിയില്ല കരയറിയില്ല
കരളില്‍ നിറയും പ്രണയോന്മാദം
അഴകേ എന്നും നീ സ്വന്തം
കടലറിയാതെ കരയറിയാതെ
പകരാം ഞാനെന്‍ ജീവിതമധുരം
നിഴലായ് കൂടെ പോരാം ഞാന്‍


കടലറിയില്ല..

ഞാന്‍ തേടിയ ചന്ദ്രോദയമീ മുഖം
ഞാന്‍ തേടിയ പ്രിയസാന്ത്വനമീ മൊഴി
അറിയാതെയൊരിതള്‍ പോയൊരു പൂവുനീ
പൊടിമൂടിയ വിലയേറിയ മുത്തുനീ
പകരമായ് നല്‍കുവാന്‍ ചുടുമിഴിനീര്‍പ്പൂവും
തേങ്ങും രാവും മാത്രം......
കനവുകള്‍ നുരയുമീ തിരകളില്‍ നീ വരൂ
ഉം... ഉം... ഉം... ഉം... ഉം...

കടലറിയില്ല..


കനല്‍മാറിയ ജ്വാലാമുഖമീമനം
ഞാന്‍തേടിയ സൂര്യോദയമീമുഖം
കളനൂപുരമിളകുന്നൊരു കനവുനീ
വിധിയേകിയ കനിവേറിയ പൊരുളുനീ
പകരമായ് നല്‍കുവാന്‍ ഒരുതീരാ-
മോഹംപേറും നെഞ്ചംമാത്രം
എന്നുമീ കൈകളില്‍ നിറയുവാന്‍ ഞാന്‍ വരും
ഉം... ഉം... ഉം... ഉം... ഉം...

കടലറിയില്ല..

ശ്രീ

നീ കാണുമോ തേങ്ങുമെന്‍ - ഇരട്ടക്കുട്ടികളുടെ അച്ഛന്‍

ചിത്രം : ഇരട്ടക്കുട്ടികളുടെ അച്ഛന്‍
ഗാനരചന : കൈതപ്രം
സംഗീതം : ജോണ്‍സണ്‍
പാടിയത് : കെ എസ് ചിത്ര








നീ കാണുമോ തേങ്ങുമെന്നുള്‍ക്കടല്‍
രജനീ അറിയുമോ വിങ്ങുമീ ഗദ്ഗദം
വെറുതെയെന്നാലും ഓര്‍മ്മ വന്നെന്‍ മിഴി നിറഞ്ഞു
മിണ്ടുവാന്‍ കൊതിയുമായെന്‍ കരള്‍ പിടഞ്ഞു

നീ കാണുമോ..

എന്‍ വാക്കുകള്‍ വാടിവീണ പൂക്കളായ്
മൂകസന്ധ്യയില്‍ അന്യയായ് മാറി ഞാന്‍
കൂടണഞ്ഞു കതിരുകാണാക്കിളി
എവിടെയോ മാഞ്ഞുപോയ് സാന്ത്വനങ്ങള്‍

നീ കാണുമോ..

പാഴ്‌മണ്ണിലെ ബാഷ്പധാരയാണു ഞാന്‍
വിരഹരാത്രിതന്‍ പാതിരാച്ചിന്തു ഞാന്‍
ഒന്നു കേള്‍ക്കൂ ജീവിതം പോയൊരീ
പാഴ്‌മുളം തണ്ടിലെ നൊമ്പരങ്ങള്‍

നീ കാണുമോ..

ശ്രീ

അനുഭൂതി തഴുകീ അദ്യവര്‍ഷമേഘം - അനുഭൂതി

ചിത്രം : അനുഭൂതി
ഗാനരചന : എം ഡി രാമചന്ദ്രന്‍
സംഗീതം : ശ്യാം
പാടിയത് : എം ജി ശ്രീകുമാര്‍







അനുഭൂതി തഴുകി ആദ്യവർഷമേഘം
ആത്മാവിലെഴുതി ഭാവന
കവിതേ നിന്നുടയാട നെയ്തൂ താഴ്വരച്ചോല
മേലേ മഴമുകിൽമാല നീളേ കുളിരൊളിമാല

ആനുഭൂതി തഴുകി....

മഞ്ജീരമണിയും മഞ്ജുളലയമോടെ
മാലേയമണിയും മഞ്ജിമയോടെ
മകരന്ദമൊഴുകും മണിമഞ്ജുഷപോലെ
മതിലേഖമുകരും മാൻമിഴിപോലെ
ഹിമകണമതിലലിയുന്നൂ ആ...ആ.ആ.ആ
നിറപൗർണ്ണമി നീയെന്നും ആ..ആ.ആ.ആ
ഏകാന്തതേയെൻ ഭാവമായ്
കനവുകളിൽ നിനവുകളിൽ കുളിരുകോരിനീ

ആനുഭൂതി തഴുകി....

സംഗീതമുണരും സ്വരമുരളികപോലെ
സായൂജ്യമണിയും സാധനപോലെ
സൗന്ദര്യലഹരി സൗപർണ്ണികപോലെ
സാഫല്യമേകും സുഷമകൾപോലെ
മിഴിയിണകളിലണയുന്നു ആ..ആ.ആ.ആ.ആ
വരവർണ്ണിനീ നീയെന്നും ആ..ആ.ആ
ശാലീനതേയെൻ ജീവനിൽ
ഇരവുകളിൽ പകലുകളിൽ തളിരുചൂടിനീ

ആനുഭൂതി തഴുകി....

ശ്രീ

നാടോടി പൂന്തിങ്കള്‍ മുടിയില്‍ ചൂടി - ഉസ്താദ്

ചിത്രം - ഉസ്താദ്
ഗാനരചന - ഗിരീഷ് പുത്തഞ്ചേരി
സംഗീതം - വിദ്യാസാഗര്‍
പാടിയത് - എം ജി ശ്രീകുമാര്‍, സുജാത

നാടോടി പൂന്തിങ്കള്‍ മുടിയില്‍ ചൂടി
നവരാത്രി പുള്ളോര്‍ക്കുടമുള്ളില്‍ മീട്ടി
കണിക്കൊന്നപ്പൂ മണിക്കമ്മലണിഞ്ഞും
പുളിയിലക്കര കസവുമുണ്ടുടുത്തും
പുഴയുന്നൊരു നാടന്‍പെണ്ണായോ
കണ്ണാടിചില്ലല തോല്‍ക്കും
ഇളനീരിന്‍ തീരാമധുരം
എള്ളോളം നുള്ളിയെടുത്തോട്ടേ
ഞാന്‍ മാറോളം മുങ്ങിനിവര്‍ന്നോട്ടേ

നാടോടി പൂന്തിങ്കള്‍

പാരിജാതം പൂത്തിറങ്ങും പാതിരാതീരത്തെന്മുന്നില്‍
വെള്ളിയാമ്പല്‍ തിരികൊളുത്തും
തിങ്കലായ് നില്‍പ്പൂ നീ മാത്രം
ആദ്യമായെന്‍ കവിളിലേതോ കൂവള
പൂക്കള്‍‍ കണ്ടോ നീ
രാഗതാരം നോക്കി സ്നേഹമായ് തൊട്ടൂ നിന്‍ കൈകള്‍
നീ മൂളും പാട്ടില്‍ മുങ്ങീ
നീ നീട്ടും മുത്തം വാങ്ങീ
ആരും കാണാതുള്ളിന്നുള്ളില്‍
താളം തുള്ളും ഈറന്‍ സ്വപ്നങ്ങള്‍

നാടോടി പൂന്തിങ്കള്‍

നാട്ടുമാവിന്‍ കൊമ്പിലേതോ കോകിലം ചൊല്ലീ സല്ലാപം
കാറ്റുകാണാക്കുരുവി പാടീ മംഗളം നാളേ മാംഗല്യം
താമര‍പ്പൂന്തുമ്പിപോലെ ചന്ദനക്കുളിരില്‍ നീരാടാന്‍
പെണ്‍കിടാവേ നീ വരുമ്പോള്‍
നെഞ്ചിലെ താലപ്പൊലിമേളം
അരയന്നത്തൂവലതണിയാം
അണിമഞ്ഞിന്‍ തുള്ളികള്‍ വേണോ
നാണം മൂടും കണ്ണൊന്നെഴുതതാന്‍ ആരും കാണാ
കാര്‍മുകിലുന്‍ മഷി വേണം
എള്ളോളം നുള്ളിയെടുത്തോട്ടേ
ഞാന്‍ മാറോളം മുങ്ങിനിവര്‍ന്നോട്ടേ

നാടോടി പൂന്തിങ്കള്‍

ശ്രീക്കുട്ടന്‍

തൂമഞ്ഞോ പരാഗം പോൽ - തക്ഷശില

ചിത്രം - തക്ഷശില
ഗാനരചന - കെ ജയകുമാര്‍
പാടിയത് - എം ജി ശ്രീകുമാര്‍
സംഗീതം - എം ജി രാധാകൃഷ്ണന്‍


തൂമഞ്ഞോ പരാഗം പോൽ
ഈ മണ്ണിൻ പ്രസാദം പോൽ
നീലത്താഴ്വാരം കാറ്റിലണയും
കാവ്യ ശകലം കേട്ടു നിൽക്കുമ്പോൾ

തൂമഞ്ഞോ പരാഗം പോൽ

മേഘങ്ങൾ മായുമ്പോൾ
ഹേമഗിരിമുടി തെളിയുമ്പോൾ
ശിശിരനിമീലിത മിഴികളിലൊരു
മുകുളം താനേ വിരിയുന്നു

തൂമഞ്ഞോ പരാഗം പോൽ

തീരങ്ങൾ കുളിരുമ്പോൾ
ശ്യാമലതികകൾ പടരുമ്പോൾ
ഹിമവാഹിനികളിൽ ഇനി മുതലൊരു
പുതു മധുരം താനേ നിറയുന്നു

തൂമഞ്ഞോ പരാഗം പോൽ
ഈ മണ്ണിൻ പ്രസാദം പോൽ
നീലത്താഴ്വാരം കാറ്റിലണയും
കാവ്യ ശകലം കേട്ടു നിൽക്കുമ്പോൾ

ശ്രീക്കുട്ടന്‍

പഞ്ചവർണ്ണക്കിളിവാലൻ - കണ്ണപ്പനുണ്ണി

പഞ്ചവർണ്ണക്കിളിവാലൻ
തളിർവെറ്റില തിന്നിട്ടോ
തമ്പുരാട്ടി ചുണ്ടു രണ്ടും ചുവന്നല്ലോ
കള്ളനാകും കാമദേവൻ
വില്ലെടുത്തു തൊടുത്തപ്പോൾ
മുല്ല മലരമ്പുകൊണ്ടു ചുണ്ടു ചുവന്നു

പഞ്ചവർണ്ണക്കിളിവാലൻ

കണ്ടിരിക്കെ കണ്ടിരിക്കെ നിന്മുഖം നാണത്താൽ
തണ്ടൊടിഞ്ഞ താമര പോൽ കുഴഞ്ഞല്ലോ
ആട്ടുകട്ടിലാടിയാടി മാറത്തെ പുടവ
കാറ്റുവന്നു വലിച്ചപ്പോൾ നാണിച്ചൂ

പഞ്ചവർണ്ണക്കിളിവാലൻ

ഇന്നുരാത്രിപുലരാതെ ഇങ്ങനെ കഴിഞ്ഞെങ്കിൽ
ഇന്ദുലേഖ പൊലിയാതെ ഇരുന്നെങ്കിൽ
പുലർകാലപൂങ്കോഴി പാതിരാക്കുയിലായെങ്കിൽ
ഉലകാകെ ഉണരാതെയിരുന്നെങ്കിൽ

പഞ്ചവർണ്ണക്കിളിവാലൻ
തളിർവെറ്റില തിന്നിട്ടോ
തമ്പുരാട്ടി ചുണ്ടു രണ്ടും ചുവന്നല്ലോ
കള്ളനാകും കാമദേവൻ
വില്ലെടുത്തു തൊടുത്തപ്പോൾ
മുല്ല മലരമ്പുകൊണ്ടു ചുണ്ടു ചുവന്നു

ശ്രീക്കുട്ടന്‍

തെക്കു തെക്കുന്നൊരു - സസ്നേഹം സുമിത്ര

തെക്കു തെക്കുന്നൊരു കാറ്റുണ്ടേ വീശുന്നേ
തെക്കന്നം കായലിന്‍ പാട്ടുണ്ടേ കേള്‍ക്കുന്നേ
തൂത്തു തളിച്ചിട്ട മുറ്റത്തില്‍ മൂലയ്ക്ക്
കാറ്റത്തിന്നാടല്ലേ പിച്ചകപ്പൂവെയില്‍

തെക്കു തെക്കുന്നൊരു കാറ്റുണ്ടേ വീശുന്നേ

പൊന്നിള വെയിലിന്‍ മഞ്ഞക്കോടിയുടുത്ത്
ചിങ്ങവയല്‍ വരമ്പത്ത് നില്ലെടീ കാറ്റേ
പച്ചനെല്ലിന്‍ കതിരിന്റെ ഉച്ചി രണ്ടായ് പകുത്തിട്ട്
കെട്ടിവച്ചതെനിക്കൊന്നു പറഞ്ഞു തന്നാല്‍
ചോക്കും വാകച്ചൊട്ടിലിരുന്നൊരു
പാട്ടിന്‍ ശീലു പകര്‍ന്നു തരാം

തെക്കു തെക്കുന്നൊരു കാറ്റുണ്ടേ വീശുന്നേ

മേടവിഷുക്കണിവച്ച കശുമാവിന്‍ കൊമ്പില്‍
ഊയലാടിയാടി നിന്ന തൈമണിക്കാറ്റേ
ഉച്ചവെയിലുരുക്കുന്ന മച്ചറയില്‍ കടന്നെന്റെ
സപ്രമഞ്ചക്കട്ടിലിന്റെ അരികില്‍ വായോ
നിന്നോടല്ലാതാരോടുള്ളിലെ
സങ്കടമെല്ലാം ഉരിയാടാന്‍

തെക്കു തെക്കുന്നൊരു കാറ്റുണ്ടേ വീശുന്നേ
തെക്കന്നം കായലിന്‍ പാട്ടുണ്ടേ കേള്‍ക്കുന്നേ
തൂത്തു തളിച്ചിട്ട മുറ്റത്തില്‍ മൂലയ്ക്ക്
കാറ്റത്തിന്നാടല്ലേ പിച്ചകപ്പൂവെയില്‍

ശ്രീക്കുട്ടന്‍

മിഴിയില്‍ എന്തേ മിന്നീ - ശുഭയാത്ര

ചിത്രം - ശുഭയാത്ര
സംഗീതം ജോണ്‍സണ്‍
ഗാനരചന - പി കെ ഗോപി
പാടിയത് - വേണുഗോപാല്‍,ചിത്ര


മിഴിയില്‍ എന്തേ മിന്നീ
കന്നിമോഹ തുഷാരം
മൊഴികളെന്തേ കൊഞ്ചി
വിണ്ണിലാവിന്‍ ഗീതം
മണിയറ തെന്നലേ
മനസ്സു നീ കണ്ടുവോ

മിഴിയില്‍ എന്തേ മിന്നീ

കാലം മന്ദഹാസം തൂകി
നമ്മെ എതിരേല്‍ക്കവേ
താരം കണ്ണു ചിമ്മി വന്നു നിന്നൂ
കിളിവാതിലില്‍
ഹൃദയചാരുതയില്‍ ഏതോ
സുഖതരംഗലയം
നെടുവീര്‍പ്പില്‍ വീണലിയും
പൂ പുളകം വിരിയും യാമം

മിഴിയില്‍ എന്തേ മിന്നീ

മൌനം പീലി നീര്‍ത്തി
വന്നതോരോ മഴവില്ലുകള്‍
മാറില്‍ സപ്തരാഗം
മീട്ടുമോരോ മണിവീണകള്‍
പ്രണയമലരുകളില്‍ ഏതോ
ശലഭമിഥുനങ്ങള്‍
ഇതളോരോന്നും തഴുകും
തേന്‍ നുകരും സുരഭിയാമം

മിഴിയില്‍ എന്തേ മിന്നീ
കന്നിമോഹ തുഷാരം

ശ്രീക്കുട്ടന്‍

മനസ്സ് ഒരു മാന്ത്രികക്കൂട് - കളിവീട്

ചിത്രം -കളിവീട്
ഗാനരചന - എസ് രമേശന്‍ നായര്‍
സംഗീതം - മോഹന്‍ സിതാര
പാടിയത് - യേശുദാസ്

മനസ്സ് ഒരു മാന്ത്രികക്കൂട്
മായകൾ തൻ കളിവീട്
ഒരു നിമിഷം പല മോഹം
അതിൽ വിരിയും ചിരിയോടെ
മറുനിമിഷം മിഴിനീരിൻ കഥയായ് മാറും

മനസ്സ് ഒരു മാന്ത്രികക്കൂട്

ഓരോ തിര പടരുമ്പോൾ
തീരം കുളിരണിയുന്നു
താനേ അതു മറയുമ്പോൾ
മാറിൽ ചിതയെരിയുന്നു
മിഴികളിലെല്ലാം കനിവാണോ
മിന്നുന്നതെല്ലാം പൊന്നാണോ
വഴി നീളെ
വഴി നീളേ ഈ പാഴ്മരങ്ങൾ
വിജനം ഈ വീഥി

മനസ്സ് ഒരു മാന്ത്രികക്കൂട്

ഉള്ളിൽ മഴ തിരയുമ്പോൾ
മുള്ളിൽ വിരൽ മുറിയുന്നു
മൂകം കഥ തുടരുമ്പോൾ
ശോകം ശ്രുതി പകരുന്നു
വിളയുന്ന നെല്ലിൽ പതിരില്ലേ
വിളക്കിന്റെ ചോട്ടിൽ നിഴലില്ലേ
അകലുന്നോ
അകലുന്നോ ആ ദാഹമേഘം
തുടരും ഈ ഗാനം

മനസ്സ് ഒരു മാന്ത്രികക്കൂട്
മായകൾ തൻ കളിവീട്

ശ്രീക്കുട്ടന്‍

ശാരോണിൽ വിരിയും - കൂടിക്കാഴ്ച

ചിത്രം - കൂടിക്കാഴ്ച
ഗാനരചന - ബിച്ചു ത്രുമല്‍
സംഗീതം - എസ് പി വെങ്കിടേഷ്
പാടിയത് - എം ജി ശ്രീകുമാര്‍, ചിത്ര

ശാരോണിൽ വിരിയും ശോശന്ന പൂവേ
ശാലീനയല്ലോ നീ
നിന്നുള്ളിൽ തുളുമ്പും തൂമധുവുണ്ണും
തേൻ തുമ്പിയെന്നും ഞാൻ
മനസ്സിന്റെ അകത്തളത്തൊരു വട്ടം
ഉണരുവാൻ എനിക്കു നീ ഇടം തരുമോ
ഇടം തന്നാൽ അതിനുള്ളിൽ ഉതിരുന്ന
പരിമളമൊരു നുള്ളു കടം തരുമോ

ശാരോണിൽ വിരിയും

കന്നിച്ചെമ്മുന്തിരി വള്ളി
നിൻ മെയ്യിൽ കിന്നരി തുള്ളി
ആവേശം പൂപ്പന്തലായ്
നാണത്തിൻ കുന്നുകൾ നിന്നോമൽ ചുണ്ടിൽ
വീഞ്ഞൂറും പനിനീർ മാതളം
പനിമലരിൻ തളിരിതളിൽ
കൊതി നുണയും തുമ്പീ
നിൻ ചിറകടി തൻ ചലനതയിൽ ജീവാനന്ദം

ശാരോണിൽ വിരിയും

മാർബിൾ വെൺ കല്ലു കടഞ്ഞ്
മാമ്പൂവിൻ മേനി നനഞ്ഞു
സീയോനിൻ മഞ്ഞിൻ തുള്ളി
ഓശാന പാടാം കുർബാന കൊള്ളാം
ഒന്നിക്കാം ഉള്ളിൽ പള്ളിയിൽ
സമരിയയിൽ പുലരികളിൽ പൊഴിയുമിളം മഞ്ഞിൽ
നാം കണികളായ് കുളിരണിയാം ജന്മം ജന്മം

ശാരോണിൽ വിരിയും ശോശന്ന പൂവേ
ശാലീനയല്ലോ നീ

ശ്രീക്കുട്ടന്‍

ആകാശമേടയ്ക്ക് വാതിലുണ്ടോ - വേനല്‍ കിനാവുകള്‍

ചിത്രം - വേനല്‍ കിനാവുകള്‍
ഗാനരചന്‍ - ഓ എന്‍ വി
സംഗീതം - എല്‍ വൈദ്യനാഥന്‍
പാടിയത് - യേശുദാസ്

ആകാശമേടയ്ക്ക് വാതിലുണ്ടോ
താഴുണ്ടോ തഴുതുണ്ടോ പാറാവുണ്ടോ
എതിലേ എതിലേ കിളി
പോയതേതു വഴിയേ

ആരാരും കാണാതെ ആ നല്ല
പൂമേട കണ്ടേവരാം
ആരാരോ പോരുന്നു
പൂമേട പൂട്ട് തുറന്നേ തരാം
വരവായ് വരവായ് ചിറകാര്‍ന്ന മോഹമിതിലേ

കാണാതെ പൊയ്പ്പോയ
രാജകുമാരിയെ വീണ്ടെടുക്കാന്‍
മന്ത്രത്താല്‍ പായുന്ന
മിന്നലിന്‍ ചേലുള്ള കുതിരയുണ്ടോ
വരവായ് വരവായ് ചിറകാര്‍ന്ന മോഹമിതിലേ

ശ്രീക്കുട്ടന്‍

ചൂടുള്ള കുളിരിനു - വീട്

ചിത്രം  - വീട്
ഗാനരചന - യൂസഫലി കേച്ചേരി
സംഗീതം - ജി ദേവരാജന്‍
പാടിയത് - യേശുദാസ്, മാധുരി

ചൂടുള്ള കുളിരിനു ചുംബനമെന്നാരു പേരിട്ടു
ചുംബനമെന്നാരു പേരിട്ടു
തണുവുള്ള തീയിനു യൗവനമെന്നാരു പേരിട്ടു
യൗവനമെന്നാരു പേരിട്ടു

കിളിയേ കിളിയേ എന്റെ
സ്വർണ്ണവർണ്ണച്ചിറകുള്ള കിളിയേ നിന്നെ
സ്വപനമെന്നു വിളിച്ചൊട്ടേ ഞാൻ
സ്വപനമെന്നു വിളിച്ചൊട്ടേ

മലരേ മലരേ സ്വർഗ്ഗത്തേനുറയും പാരിജാത
മലരേ നിന്നെ
പ്രേമമെന്നു വിളിച്ചോട്ടേ ഞാൻ
പ്രേമമെന്നു വിളിച്ചോട്ടേ

കടലേ കടലേ തിരമാലയെന്നും നിലക്കാത്ത കടലേ നിന്നെ
മോഹമെന്നു വിളിച്ചോട്ടേ ഞാൻ
മോഹമെന്നു വിളിച്ചോട്ടേ

ലതികേ ലതികേ വിണ്ണിൻ
നന്ദനത്തിൽ പൂത്തു നില്‍ക്കും ലതികേ നിന്നെ
കാവ്യമെന്നു വിളിച്ചോട്ടേ ഞാൻ
കാവ്യമെന്നു വിളിച്ചോട്ടേ

ശ്രീക്കുട്ടന്‍

തമ്പ്രാന്റെ മഞ്ചല്‍ മൂളി - നാടോടി

ചിത്രം - നാടോടി

ജുംബാ ജുംബാ ജുംബാജുംബാ
ജുംബാ ജുംബാ ജുംബാജുംബാ
തമ്പ്രാന്റെ മഞ്ചല്‍ മൂളി താഴോട്ട് പോരുന്നുണ്ടേ
കോലോത്തേ തമ്പ്രാനാണേ ചേലൊത്ത തമ്പ്രാട്ടിയും

ചാഞ്ചക്കം ചക്ക ചക്ക ഇക്ക് ചക്ക
ചാഞ്ചക്കം ചക്ക ചക്ക ഇക്ക് ചക്ക

ജുംബാ ജുംബാ ജുംബാജുംബാ
ജുംബാ ജുംബാ ജുംബാജുംബാ
മാനോടും താഴ്വാരത്തേ ഹ.ഹാ
മാളോരേ നൃത്തം കണ്ടേ
തമ്പ്രാനും തമ്പ്രാട്ടിയും സന്തോഷം കൂടുന്നുണ്ടേ

ചാഞ്ചക്കം ചക്ക ചക്ക ഇക്ക് ചക്ക
ചാഞ്ചക്കം ചക്ക ചക്ക ഇക്ക് ചക്ക

പൂമാനം മേലേ പൂ​‍ക്കുട പോലെ
മാനം നല്ല മുത്ത് മേഞ്ഞുനടന്നേ
കാട്ടാറിന്‍ പാട്ടും കേട്ടുവളര്‍ന്നേ നീ
പാട്ടുപാടുമ്പം കാട്ടുതേനിമ്പം
ഹേയ് നാടാറുമാസം നീ അലഞ്ഞില്ലേ
കാടു കണ്ണുനട്ട് കാത്തിരുന്നില്ലേ
നീ വന്ന കണ്ടോ നീര്‍കിളികള്‍ പാടി
നീലമാനത്തെ നീര്‍മുകില്‍ മൂടി
കാടു നെയ്തൊരു ചന്ദനപട്ടിതു
കാലണക്കിളി നിന്നെയുടുപ്പിച്ചു
പാടിയും ആടിയും തീരത്ത് കൂടുന്നതാരാണാരോ

ചാഞ്ചക്കം ചക്ക ചക്ക ഇക്ക് ചക്ക
ചാഞ്ചക്കം ചക്ക ചക്ക ഇക്ക് ചക്ക

തീ കാഞ്ഞിരിക്കാം ഈ കുളിര്‍ രാവില്‍
കാട്ടുതേന്‍ കുടിച്ചു കണ്ണു തുടിച്ചു
പൂവിന്റെ രക്തം വാറ്റിയതാണീ തേന്‍
പാവം പെണ്ണേ നീ കട്ടുകുടിച്ചു
ആടാടു പാമ്പേ പാടുവതിന്നാരോ
നീല നാഗിനിയായ് ആടുവതാരോ
മിന്നാമിനുങ്ങായ് പാലമരക്കൊമ്പില്‍
ഏതോ ഗന്ധര്‍വ്വന്‍ കണ്ണുകള്‍ ചിമ്മി
കാറ്റുമൂളുന്നു തന്തന തന്തന
കാടുലയുന്നു തിന്തിന തിന്തിന
കാനന മങ്കതന്‍ പൂങ്കുടി മുറ്റത്തു
താളം മേളം

ചാഞ്ചക്കം ചക്ക ചക്ക ഇക്ക് ചക്ക
ചാഞ്ചക്കം ചക്ക ചക്ക ഇക്ക് ചക്ക

ജുംബാ ജുംബാ ജുംബാജുംബാ
ജുംബാ ജുംബാ ജുംബാജുംബാ
തമ്പ്രാന്റെ മഞ്ചല്‍ മൂളി താഴോട്ട് പോരുന്നുണ്ടേ
കോലോത്തേ തമ്പ്രാനാണേ ചേലൊത്ത തമ്പ്രാട്ടിയും

ചാഞ്ചക്കം ചക്ക ചക്ക ഇക്ക് ചക്ക
ചാഞ്ചക്കം ചക്ക ചക്ക ഇക്ക് ചക്ക

ശ്രീക്കുട്ടന്‍

ചിന്നുക്കുട്ടീ ഉറങ്ങീല്ലേ - ഒരു നോക്കു കാണാന്‍

ചിത്രം - ഒരു നോക്കു കാണാന്‍
ഗാനരചന - ചുനക്കര രാമന്‍ കുട്ടി
സംഗീതം - ശ്യാം
പാടിയത് - ഉണ്ണിമേനോന്‍, ചിത്ര

ചിന്നുക്കുട്ടീ ഉറങ്ങീല്ലേ
ഉണ്ണിമോളേ ഉറങ്ങീല്ലാ
പുന്നാരമേ പറന്നെന്റെ മുന്നിൽ
തളിരു മേനിയിൽ കുളിരുമായ് നീ
പുന്നാരമേ വരുകില്ലേ പുന്നാരമേ വരുകില്ലേ

ഇണക്കിളീ പറന്നെന്റെ മുന്നിൽ
തളിരു മേനിയിൽ കുളിരുമായി നീ
ഇണക്കിളീ വരുകില്ലേ
ഇണക്കിളീ വരുകില്ലേ

ഹേമന്തം വരവായി സഖീ
നീ മന്ദം നൃത്തമാടി വരൂ
മോഹമാം കിളി ഉണരുന്നു
ദാഹമായിന്നു പാടുന്നു
നീ മഴവിൽ കൊടിപോൽ വിരിയൂ
ഹൃദയ വാടിയിൽ ഓ..ഓ..
മൃദുലരാഗമായ് ആ..ആ

ഇണക്കിളീ വരുകില്ലേ ഇണക്കിളീ വരുകില്ലേ

പൂവായി ഞാൻ മാറിടുകിൽ
നീ വണ്ടായി വന്നു ചേർന്നിടുമോ
ആശ തൻ മരമുലയുമ്പോൾ
ആയിരം കനിയുതിരുമ്പോൾ
നീ മധുര കുഴമ്പായ് അണയൂ
മനസ്സിലെങ്ങുമേ ഓ..ഓ..
തനുവിലെങ്ങുമേ ആ..ആ.

ഇണക്കിളീ വരുകില്ലേ ഇണക്കിളീ വരുകില്ലേ

ഇണക്കിളീ പറന്നെന്റെ മുന്നിൽ
തളിരു മേനിയിൽ കുളിരുമായി നീ
ഇണക്കിളീ വരുകില്ലേ
ഇണക്കിളീ വരുകില്ലേ

ശ്രീക്കുട്ടന്‍

രാഗദേവനും നാദകന്യയും - ചമയം

ചിത്രം - ചമയം
ഗാനരചന - കൈതപ്രം
സംഗീതം - ജോണ്‍സണ്‍
പാടിയത് - എം ജി ശ്രീകുമാര്‍, സുജാത

രാഗദേവനും നാദകന്യയും
പ്രണയതീരത്തെ പൂന്തിരകളില്‍
മുങ്ങാം കുഴിയിട്ടു അറിയാപ്പവിഴം തേടി
അലകളില്‍ ഈറനാം കവിത തേടി

രാഗദേവനും നാദകന്യയും

പണ്ടേതോ ശാപങ്ങള്‍ സ്വപ്നത്തിന്‍ കാമുകനെ
ചിപ്പിയിലെ മുത്താക്കി നുരയിടുമലയാഴിയില്‍
രാഗലീനയാം നാദ്യകന്യയോ
തേടിയെങ്ങുമാ സ്നേഹരൂപനേ
കണ്ണീരുമായ് മോഹിനി പാടിനടന്നു
വിരഹസാന്ദ്രയാം ചന്ദ്രലേഖപോല്‍
പ്രണയതീരത്തെ പൂന്തിരകളില്‍
മുങ്ങാം കുഴിയിട്ടു അറിയാപ്പവിഴം തേടി
അലകളില്‍ ഈറനാം കവിത തേടി

രാഗദേവനും നാദകന്യയും

കാണാമറ മായുമ്പോള്‍ താപസ്സനാം മാമുനിയാ
ചിപ്പിയിലെ തൂമുത്തിന്‍ തെളിമയിലൊളി തൂകവേ
മോഹസന്ധ്യയില്‍ പ്രേമലോലനെ
കണ്ടറിഞ്ഞുപോല്‍ നാദസുന്ദരി
ജന്മങ്ങള്‍ നീളുമോര്‍മ്മയായ് മധുരനിലാവില്‍

രാഗദേവനും നാദകന്യയും
പ്രണയതീരത്തെ പൂന്തിരകളില്‍
മുങ്ങാം കുഴിയിട്ടു അറിയാപ്പവിഴം തേടി
അലകളില്‍ ഈറനാം കവിത തേടി

ശ്രീക്കുട്ടന്‍

കണ്ണു തുറക്കാത്ത - അഗ്നിപുത്രി

ചിത്രം - അഗ്നിപുത്രി
ഗാനരചന - വയലാര്‍
സംഗീതം - എം എസ് ബാബുരാജ്
പാടിയത് - പി സുശീല


കണ്ണു തുറക്കാത്ത ദൈവങ്ങളേ
കരയാനറിയാത്ത ചിരിക്കാനറിയാത്ത
കളിമൺ പ്രതിമകളേ
മറക്കൂ നിങ്ങളീ ദേവദാസിയെ മറക്കൂ  മറക്കൂ

ആയിരമായിരം അന്തപ്പുരങ്ങളിൽ
ആരാധിച്ചവൾ ഞാൻ നിങ്ങളെ
ആരാധിച്ചവൾ ഞാൻ
നിങ്ങളൊരിക്കൽ ചൂടിയെറിഞ്ഞൊരു
നിശാഗന്ധിയാണു ഞാൻ

കണ്ണു തുറക്കാത്ത ദൈവങ്ങളേ

കർപ്പൂര നാളമായ് നിങ്ങൾ തൻ മുൻപിൽ
കത്തിയെരിഞ്ഞവൾ ഞാൻ ഒരു നാൾ
കത്തിയെരിഞ്ഞവൾ ഞാൻ
കണ്ണീരിൽ മുങ്ങിയ തുളസിക്കതിരായ്
കാൽക്കൽ വീണവൾ ഞാൻ
കാൽക്കൽ വീണവൾ ഞാൻ

കണ്ണു തുറക്കാത്ത ദൈവങ്ങളേ
കരയാനറിയാത്ത ചിരിക്കാനറിയാത്ത
കളിമൺ പ്രതിമകളേ
മറക്കൂ നിങ്ങളീ ദേവദാസിയെ മറക്കൂ  മറക്കൂ

ശ്രീക്കുട്ടന്‍

എല്ലാരും ചൊല്ലണു - നീലക്കുയില്‍

ചിത്രം - നീലക്കുയില്‍
ഗാനരചന- പി ഭാസ്ക്കരന്‍
സംഗീതം - കെ രാഘവന്‍
പാടിയത് - ജാനമ്മ ഡേവിഡ്

എല്ലാരും ചൊല്ലണു
കല്ലാണീ നെഞ്ചിലെന്നു
കരിങ്കല്ലാണീ നെഞ്ചിലെന്നു
ഞാനൊന്നു തൊട്ടപ്പോള്‍
നീലക്കരിമ്പിന്റെ തുണ്ടാണ് കണ്ടതയ്യാ
ചക്കര തുണ്ടാണ് കണ്ടതയ്യാ

നാടാകെ ചൊല്ലണ് നാട്ടാരും ചൊല്ലണ്
കാടാണ് കരളിലെന്ന്‍
കൊടും കാടാണ്
കൊടും കാടാണീ കരളിലെന്ന്‍
ഞാനങ്ങ് കേറിയപ്പോ നീലക്കുയിലിന്റെ
കൂടാണു കണ്ടതയ്യാ
കുഞ്ഞി കൂടാണു കണ്ടതയ്യാ

എന്തിങ്ങു നോക്കണ് എന്തിങ്ങു നോക്കണ്
ചന്ദിരാ നീ ഞങ്ങളേ അയ്യോ ചന്ദിരാ
അയ്യോ ചന്ദിരാ നീ ഞങ്ങളേ

ഞാനില്ലാ മേപ്പോട്ടു ഞാനില്ലാ മേപ്പോട്ടു
കല്യാണചെക്കനുണ്ട്
താഴെ കല്യാണചെക്കനുണ്ട്
ചെണ്ടൊന്ന്‍ വാങ്ങണം മുണ്ട് മുറിക്കണം
പൂത്താലീ കെട്ടീടേണം
പൊന്നിന്‍ പൂത്താലീ കെട്ടീടേണം

കളിയല്ല കിളിവാലന്‍ വെറ്റില തിന്നെന്റെ
ചുണ്ടൊന്നു ചോപ്പിക്കേണം
എന്റെ ചുണ്ടൊന്നു ചോപ്പിക്കേണം

എല്ലാരും ചൊല്ലണു
കല്ലാണീ നെഞ്ചിലെന്നു
കരിങ്കല്ലാണീ നെഞ്ചിലെന്നു
ഞാനൊന്നു തൊട്ടപ്പോള്‍
നീലക്കരിമ്പിന്റെ തുണ്ടാണ് കണ്ടതയ്യാ
ചക്കര തുണ്ടാണ് കണ്ടതയ്യാ

ശ്രീക്കുട്ടന്‍

എല്ലാരും പാടത്തു - നിങ്ങളെന്നെ കമ്മ്യൂണിസ്റ്റാക്കി

ചിത്രം - നിങ്ങളെന്നെ കമ്മ്യൂണിസ്റ്റാക്കി
ഗാനരചന - വയലാര്‍
സംഗീതം - ജി ദേവരാജന്‍
പാടിയത് - പി സുശീല

എല്ലാരും പാടത്തു സ്വർണ്ണം വിതച്ചൂ
ഏനെന്റെ പാടത്തു സ്വപ്നം വിതച്ചൂ
സ്വർണ്ണം വെളഞ്ഞതും നൂറു മേനി
സ്വപ്നം വേളഞ്ഞതും നൂറു മേനി

പകൽ വാഴും തമ്പിരാൻ വന്ന്
പൊന്നും വെയിൽക്കുട നീർത്തുമ്പോൾ
കിളിയാട്ടാൻ ഏനിറങ്ങീ
കിലു കിലെ കിലു കിലെ വള കിലുങ്ങീ കൈയ്യിൽ
കിലു കിലെ കിലു കിലെ വള കിലുങ്ങീ
ഹൊയ് താര തിന്തത്താര തിന്തതാനനാ..

രാവു വാഴും തമ്പിരാൻ വന്ന്
രാമച്ച വിശറികൾ വീശുമ്പോൾ
കനവും കണ്ട് ഏനുറങ്ങീ
കിരു കിരെ കിരു കിരെ കുളിരു കോരി ഏനു....
കിരു കിരെ കിരു കിരെ കുളിരു കോരി
ഹൊയ് താര തിന്തത്താര തിന്തതാനനാ..

കരൾ വാഴും തമ്പിരാൻ വന്ന്
കന്നികതിർക്കുടം കൊയ്യുമ്പോൾ
കുയിൽ പാടീ കുരുവി പാടീ
കൊയ്താലും കൊയ്താലും തീരൂല്ലാ പാടം
കൊയ്താലും കൊയ്താലും തീരൂല്ലാ
ഹൊയ് താര തിന്തത്താര തിന്തതാനനാ..

ശ്രീക്കുട്ടന്‍

ഭഗവാനൊരു കുറവനായി - വാഴ്വേ മായം

ചിത്രം - വാഴ്വേ മായം
ഗാനരചന - വയലാര്‍
സംഗീതം - ജി ദേവരാജന്‍
പാടിയത് - പി ലീല

ഭഗവാനൊരു കുറവനായി
ശ്രീ പാർവതി കുറത്തിയായി
ധനുമാസത്തിൽ തിരുവാതിര നാൾ
തീർഥാടനത്തിനിറങ്ങീ അവർ
ദേശാടനത്തിനിറങ്ങീ

ഭഗവാനൊരു കുറവനായി

കാശ്മീരിലെ പൂവുകൾ കണ്ടൂ
കന്യാകുമാരിയിൽ കാറ്റു കൊണ്ടൂ
നാടുകൾ കണ്ടൂ നഗരങ്ങൾ കണ്ടൂ
നന്മയും തിന്മയും അവർ കണ്ടൂ

ഭഗവാനൊരു കുറവനായി

ആശ്രമങ്ങൾ കണ്ടൂ അമ്പലങ്ങൾ കണ്ടൂ
പണക്കാർ പണിയിച്ച പൂജാമുറികളീൽ
പാല്പായസമുണ്ടു
അവർ പലപല വരം കൊടുത്തൂ
കൈമൊട്ടുകൾ കൂപ്പിയും കൊണ്ടേ
കണ്ണീരുമായ് ഞങ്ങൾ കാത്തു നിന്നു
പാവങ്ങൾ ഞങ്ങൾ പ്രാർഥിച്ചതൊന്നും
ദേവനും ദേവിയും കേട്ടില്ല

ഭഗവാനൊരു കുറവനായി
ശ്രീ പാർവതി കുറത്തിയായി
ധനുമാസത്തിൽ തിരുവാതിര നാൾ
തീർഥാടനത്തിനിറങ്ങീ അവർ
ദേശാടനത്തിനിറങ്ങീ

ശ്രീക്കുട്ടന്‍